‘Indi na batasan ni Claire nga las-kuwatro sang kaagahon, galakat siya’ –tiyo ni Claire Diergos matapos na-capture sang CCTV camera nga nagapaguwa ang salakyan sang biktima sa Deca Homes sa Pavia sang October 25 sang kaagahon

ILOILO – Wala ginabayaan ni Claire Diergos ang iya bata nga wala sang ginasaligan nga mabantay.

Pahayag ini ni Mr. Gaylor Carumba nga tiyo ni Claire.

Suno kay Mr. Carumba, siya ang gina-contact sang iya hinablos nga mag-drive kun mag-deliver siya sang iya mga baligya kag kinahanglan niya dal-on ang iya tatlo ka tuig nga bata bangud wala sang bilinan.

“Si Claire na ‘ya, indi niya na pag-i-compromise ang bata [niya]. Biskan ano matabu, dal-on niya gid na [kun wala gabantay]… Wala na siya ‘ya gabilin sang bata,” suno kay Carumba.

Dugang sang tiyo, wala man sang batasan si Claire nga magguwa sa balay sang kaagahon.

Sa footage nga na-capture sang CCTV camera sa kalinyada nga balay ni Claire, nakita ang paglabay sang iya nga salakyan nga nagapagguwa sa Deca Homes sa Pavia, las-4:20 sang kaagahon sang Oktubre 25. Indi lang kitaun kun sin-o ang naga-drive bangud madulom sa sulod sang salakyan.

Natukiban ang bangkay ni Claire sa sulod sang iya salakyan sa Brgy. Inangayan, Sta. Barbara sang Oktubre 26 sang hapon. – via Aksyon Hotline