2 ka lalaki, nagreklamo nga ginhurikap sang lalaki nga nagpakilala nga pulis sa bar sa Mandurriao

ILOILO CITY – Nagreklamo sa Mandurriao Police Station ang duha ka mga lalaki nga ginhurikap sila sang lalaki man nga nagpakilala nga police sa sulod sang MO2 sa Smallville Complex sa Mandurriao, kaina sang kaagahon.

Suno kay Police SSgt. Sidney Calata, imbestigador sang Mandurriao Police Station, nagasaut ang mga tagreklamo sang ginpalapitan sang grupo sang lalaki nga ila ginareklamo.

Ginpahayag sang isa ka tagreklamo nga ginhalukan siya sa guya sang lalaki nga nagpakilala nga pulis kag ginhikap ang iya pribado nga parte sang lawas.

Ginpahayag man sang isa pa ka complainant nga ginkuha sang ila ginareklamo ang iya nga kamot kag ginpahikap ang pusil nga ginataklos sini sa iya nga likod, dugang pa ni Calata.

Wala man sang komosyon nga natabo suno kay Calata. Natalana pa nga kadtuan sang police ang MO2 agud ma-check ang ila CCTV camera footages. — AM Reports