Desisyon sang 7 private hospitals sa Iloilo City kun mag-disengage sa PhilHealth sa 2022, mahibaluan subong nga semana

ILOILO CITY – Mapatawag ang Private Hospitals Association of the Philippines Iloilo Chapter sang press conference ukon mapaguwa sang public advisory subong nga semana kun ano ang pinal nga desisyon sang pito ka private hospitals sa syudad sang Iloilo nga una na nag-anunsyar nga ma-disengage sa PhilHealth.

Suno kay Dr. Elmer Pedregosa nga presidente sang PHAP – Iloilo, Disyembre 20 sang nag-abot sa syudad si PhilHealth President & CEO Atty. Dante Gierran sa diin nadiskusyunan ang mga problema sang mga ospital kag PhilHealth regional office.

Nagtanyag suno sa iya ang PhilHealth sang debit-credit scheme. “They will pay 80% of the good claim, tapos i-reconcile [sang ospital] with PhilHealth. And then they will pay the remaining 20%. It looks interesting and very good. Pero we don’t see transparency because we don’t know paano nila i-determine ang good claims. Kay sa amon experyensya ‘ya, ang good claims and in process, ka dyutay lang. It’s more of the return to hospitals and denied claims so we did not agree with that.”

Nagpasalig man si Gierran nga mapadala liwat sang proposal agud mabayaran ang unpaid claims sang mga ospital antes ukon sa Disyembre 24. Pero wala pa sang nabaton nga feedback ang mga ospital tubtob subong.

Sang Oktubre nga reconciliation meeting sang mga administrators sang private hospitals sa syudad sa taga-PhilHealth 6 sa pagpatunga sang Anti-Red Tape Authorities, na-identify na suno kay Dr. Pedregosa nga wala naga-match sang accounting records sang mga ospital kag PhilHealth.

“For example, ang accounts receivables [sa hospital records], naga-include sang tanan nga naguwa nga gin-submit [sa PhilHealth] kag wala pa nabayran. Sa Philhealth, ang good claims lang ang ara sa ila accounts payable. Wala sa record nila ang return to hospitals kag ang denied claims. Amo ini ang ginahambal sa PhilHealth nga accounts nga wala pa nabayran, not only months… tinuig na ini,” ang pahayag pa ni Dr. Pedregosa.

As of November 30, suno kay Dr. Pedregosa, naghabok na sa P825 million ang unpaid claims sang mga ospital sa syudad nga wala gihapon mabayaran sang PhilHealth. Mas mataas ini sa P545 million nga figure sang Agosto 31, 2021.

“Siling namon, if this is the case, if we have to sign again for another year, basi mag-isa na ni ka bilyon ang balayran sang PhilHealth… kay every week, we are submitting hundreds of claims,” suno kay Pedregosa.

Nagahulat ang mga private hospitals sa syudad sa masunod nga tikang sang PhilHealth, suno kay Pedregosa. “With the remaining days left [before 2022], we have not heard from them (PhilHealth). It’s almost like a silent treatment. Ma-notice mo man nga wala sang statement from PhilHealth –kun ano ang himuon sang mga members in case ang mga hospitals ma-disengage. Wala man sila nag-meet sa amon kun ano na ni ang progreso sini.” – via Firingline/Aksyon Hotline