PRO 6, nagapati nga disiplinado ang kapulisan sa Western Visayas kasunod sang ‘no gun muzzle sealing’ sang PNP sa pagsug-alaw sang bag-ong tuig

ILOILO — Kumpiyansa si Police Regional Office 6 Spokesperson PLTCOL Arnel Solis nga disiplinado kag mga professional ang kapulisan sa Western Visayas.

Kasunod ini sang desisyon sang Philippine National Police (PNP) nga indi magpang-tape sang kanyon sang ila mga pusil sa pagsug-alaw sang bag-ong tuig.

Suno kay Solis, wala man sang na-record ang PNP nga may police sa Western Visayas nga nagpalupok sang pusil sang nagsug-alaw sang 2021 bisan nga wala man sila sang muzzle taping.

Ginpahanumdom ni Solis sa kapulisan nga dako ang ila mangin salabton kun mapamatud-an nga nagpalupok sila sang pusil sa new year.

Magapangatubang sila sang administrative charges kag mabutang pa sa alang-alang ang ila nga trabaho. Iga-relieve man ang unit commander sang pulis nga nagpalupok base sa mandu sang PNP headquarters. — via AM Reports