Suspek sa pagpang-hold up sa “Lugawan ni Bro” sa Jaro, ginhingadlan sang police

ILOILO CITY – Ginpangalanan na sang Jaro police ang suspek sa pagpang-hold up sa “Lugawan ni Bro” sa Democracia, Jaro sang Enero 19, 2022.

Ginkilala sang police ang suspek kay Rolan Gasparillo, ginabanta 30-anyos kag residente sang Benedicto, Jaro.

Ginpahayag ni PCpl. Joevar Panes, imbestigador sang Jaro Police Station, nga ginakuhaan pa nila sang dugang nga statement ang duha ka nagabantay sa lugawan agud ma-file na ang kaso subong nga adlaw.

Dugang pa ni Panes, nagpadulong sa Jaro Police Station ang babaye nga ginapatihan upod ni Rolan, pero gin-clear niya ang iya ngalan kag ginpanindugan nga wala siya sang partisipasyon sa natabo.

Gin-ako sang babaye nga kasilingan niya si Rolan kag kilalahay sila, pero wala siya nagpanumdom nga magpanghold-up ang lalaki.

Wala pa madakpan si Rolan nga suno sa Jaro police, may mga records na sang pagpangawat.

Nagalab-ut sa P5,250 ang kwarta nga nakuha sang suspek sa Lugawan, suno sa mga nagabantay. – via Jil Caceres