Senior citizen nga babaye, ginsakit kag gin-agawan sang cellphone sang lalaki nga nagsulod sa iya balay sa Guimbal

GUIMBAL, ILOILO – Ginsakit kag gin-agawan sang cellphone sang 27-anyos nga lalaki ang senior citizen nga tag-iya sang balay nga iya ginsulod sa Brgy. Nanga sang Mayo 30 sang gab-i.

Ginkilala ang lalaki kay John Lorence Vales alyas “Lupog” sang Brgy. Pescadores, Guimbal samtang ginkilala naman ang senior citizen kay Ruby Hernabe, 75-anyos.

Suno kay PSMSgt. Joey Lauron, imbestigador sang Guimbal Police Station, halin sa guwa sang balay si Hernabe kag na-abtan niya si Lupog sa ila nga sala. Gin-agaw ni Lupog ang cellphone sang tigulang kag ginguyod niya pa ini pa guwa sa ila nga balay. Dugang pa ni Lauron, ginbunggo pa ni Lupog sa pader ang ulo sang tigulang.

Nabatian na lang sang bata ni Hernabe nga kaupod niya man sa balay ang iya pagpangayo sang bulig. Samtang, gilayon nga nagpalagyo si Lupog.

Ginpahayag pa ni Lauron nga nagatrabaho si Lupog malapit man sa balay ni Hernabe kag nagakadto man siya kun kaisa sa balay sang tigulang. Posible suno sa police nga nahibaluan sang lalaki kun diin nakabutang ang kwarta sa sulod sang balay.

Nadakpan naman sa hot pursuit operation sang kapulisan si Lupog kag na-recover ang cellphone sang tigulang. Ginkumpirmar man ni Lauron nga may mga kaso na sang pagpangawat si Lupog kag na-preso man sadto bngud sa kaso may kaangtanan sa illegal drugs.