Windshield sang salakyan, nabuka sang ginhabuyan sang bato sang ginapatihan 7 ka mga lalaki sa Dueñas, Iloilo

ILOILO — Nabuka ang windshield sang Toyota Avanza sang ginhabuyan sang bato sang mga pamatan-on nga ginapatihan nang-tripping sa Brgy. Punong Grande, Dueñas, Iloilo las-12:59 sang kaagahon sang Mayo 31.

Suno sa tag-iya sang salakyan nga si Viola Padios, halin sila sa Passi City kag mapadulong kuntani sa Dumangas upod ang iya bana nga nagamaneho sang salakyan kag lima (5) pa gid ka mga sakay.

Ginpahayag ni Padios nga paglab-ot sa Brgy. Punong Grande, Dueñas, gulpi lang may naglagapok kag nakita nga nabuka na ang windshield sang ila salakyan.

Nagpalab-ot sang reklamo sa Dueñas Police kanday Padios kag gilayon nga ginkadtuan sang kapulisan ang lugar.

Ginpahayag ni PMaj. Jose Rey Pabala, hepe sang Dueñas Police, ginabanta sa pito (7) ka mga lalaki ang nakita sang witness nga nagpang-tripping nga halin sa namatyan kag naghagaray nga magpanghaboy sang bato.

Ginakumpirmar pa sang Dueñas police kun bala mga menor-de-edad ang mga lalaki.

Dugang pa ni Pabalan nga may apat pa ka mga salakyan ang naigo sa pagpanghaboy sang bato, antes naglabay ang salakyan nanday Padios.

Gindala ang bana ni Padios sa espesyalista agud ipalantaw ang iya mata nga na-agsikan sang bubog sang windshield.

Padayon pa ang imbestigasyon sang Dueñas Police bangud nahibaluan nga may yara man sang mga reklamo sang nagligad nga binulan may kaangtanan sa pagpanghaboy sang bato.