Bangkay sang lalaki, nasapwan sa Aganan River sa Pavia

ILOILO – Patay na sang nasapwan subong nga aga ang lalaki nga gin-report nga manguha sang kalampay sa Aganan River sa Brgy. Anilao, Pavia.

Ginkilala sang iya pamilya ang napatay kay Lemuel Guadaña, 54 sang nasambit nga barangay.

Suno kay Renalyn Berioso, anak sang biktima, aga pa sang Biyernes, Hunyo 24 sang naghalin sa ila balay ang iya amay kag wala na makapauli.

Gin-check niya ang CCTV footage sang barangay kag nakit-an nga nagpanaug sa suba ang iya amay rason nga iya ginkadtuan kag nakit-an nga naga-utaw-utaw na sa tubig.

Nagapati si Berioso nga nakadanlog ang amay niya bangud may pilas sa likod sang iya ulo.

Indi na pag-ipa-autopsy sang pamilya ang bangkay ni Guadaña.