Lalaki nga nagpamiesta sa Naoway Island sa Sibunag, Guimaras, patay na sang nasapwan

Nasapwan ang bangkay sang lalaki nga naga-utaw-utaw sa Naoway island, Brgy San Isidro, Sibunag, Guimaras kahapon sang aga, Hunyo 25.

Ginkilala ang lalaki kay Jenil Dulaca, 24-anyos sang Unisan Island, Barangay Guiwanon, Nueva Valencia, Guimaras.

Suno kay PMSg Goldmar Monreal, imbestigador sang Sibunag Municipal Police Station, nakit-an ang bangkay sang lalaki 15 metros ang kalayuon sa shoreline las-6:15 kaina sang aga.

Sa pagpangusisa sang mga pulis sa mga residente, nagpadulong kahapon sang aga sa isla si Dulaca agud magpamiesta kag ginpahayag nga hubog.

Mga las-4 sang hapon sang nakit-an siya sang mga residente nga yara sa kilid sang baybay.

Nagapadayon ang imbestigasyon sang kapulisan.

Luyag man sang pamilya nga ipa-autopsy ang bangkay sang lalaki agud mahibaluan gid ang rason sang iya kamatayon.