Modified routes sa Iloilo City nga ginpresentar sa Transport Summit, pabor sa mga commuters

ILOILO CITY — Pabor para sa mga commuters ang modified routes sang mga depasahero nga jeep nga ginpresentar sang technical working group sa Transport Summit nga ginhiwat sa UP-Visayas may kaangatanan sa Local Public Transport Route Plan (LPTRP) sa Iloilo City.

Suno kay Western Visayas Transport Cooperative (WVTC) Pres. Raymundo Parcon, pareho gid ang modified routes sa mga ruta nga gin-propose sang mga transport group.

Mahapos man ini sa mga commuters suno sa iya bangud indi na kinahanglan pa sang mga pasahero magsakay sang pila ka beses antes makalab-ot sa ila kaladtuan bangud wala sang mga ginpang-utod nga ruta pareho sa una nga pag-implementar sang LPTRP.

Wala man sang problema para sa iya ang mga bag-o nga ruta bangud nagatambong gid siya sa kada-meeting sang gindihon ang modified routes.