Nagapalapta sang fake news sa social media may kaangtanan sa kidnapping, abduction, pwede makasuhan suno sa ICPO

Nagpaandam ang Iloilo City Police Office sa publiko nga nagapalapta sang fake news sa social media nga may kaangtanan sa kidnapping kag abduction sa syudad.

Suno kay ICPO Director PCOL Leo Batiles, indi matuod ang tanan nga gina-post sa social media nga may mga nagkaladula nga kabataan kag babaye.

Gin-verify ang impormasyon apang wala sang may makapamatuod kag wala sang mga nagpalab-ot sang reklamo sa pulis nga may nadula sa ila pamilya.

Ginahibalo sang pulis kun sin-o ang nagpalapta sang fake news para mapasakaan sang kaso.

Sang nagligad lang nga adlaw may babaye nga nag-post sa iya social media nga may duha ka babaye nga gin-abduct sa area sa La Paz.

Apang, suno sa La Paz pulis wala sang may nag-report sa ila nga may nadula nga duha ka babaye.

Nagpangabay ang ICPO nga I-verify ang mga impormasyon kag indi gilayon mag-post sa social media.