Caretaker sang apartment sa Jaro patay sang nahulog sa 3rd floor
ILOILO CITY — Patay ang caretaker sang apartment sa Balantang, Jaro sang nahulog sa ikatatlo nga panalgan sang building.
Ginkilala ang biktima kay Justin Esteva, 24-anyos sang Brgy. Canawili, Janiuay kag temporaryo nga naga-estar sa Villa Ofelia Subdivision sa Brgy. Balantang.
Suno kay Police Staff Sergeant Mary Lye Vencer, imbestigador sang Jaro Police Station, natabu ang aksidente las 3 pasado sang kaagahon sang nagkadto si Esteva sa pihak nga apartment agud mag-inum inom.
Upod sang biktima sa pag-inum inom kanday Michael Evalorasa, 39-anyos sang Tumcon Ilaud Pototan, kag Aldrich Miraña, 40, Brgy. Balantang Jaro sang may nagpatunga nga gamo kanday Esteva kag Miraña tubtob nga nagdalagan si Esteva sa 3rd floor kag nahulog.
Gindala pa siya sa Metro Iloilo Hospital pero gindeklarar nga dead-on-arrival.
Pasakaan naman sang kaso nga homicide kanday Evalorasa kag Miraña kag obstruction of justice bangud sa indi nila pagpasugot nga maka-imbestigar ang police sa sulod sang compound diin nahulog si Esteva.