Infected area sang ASF sa Oton, gin-extend sa 7-km radius

ILOILO — Gin-extend sang local government unit sang Oton sa seven-kilometer radius ang infected area sang African Swine Fever (ASF) sa banwa.

Ginkumpirmar ni Oton Vice Mayor Niel Olivares nga halin sa one-kilometer, ginhimo ini nga seven-kilometer radius halin sa ground zero ukon sa Brgy. Bita Norte sa diin na-record ang kumpirmado nga kaso sang ASF.

Bangud sini, masobra na sa 10 ka mga barangay ang infected sang ASF, suno sa bise alkalde.

Ginpahayag ni Olivares nga naga-upod sa pag-monitor kag surveillance sa banwa ang mga taga-Bureau of Animal Industry kag Department of Agriculture agud masiguro nga wala sang makaguwa nga baboy halin sa infected area.

Una na ginpaidalum sa state of calamity ang Oton sang nagligad nga semana kag gin-classify nga Red ukon Infected Zone base sa Executive Order No. 460 ni Iloilo Governor Arthur Defensor, Jr.

Ang ASF ang makalalaton kag makamamatay nga balatian nga naga-apekto sa tanan nga mga baboy suno sa US Department of Agriculture.