P1-M nga balor sang suspected shabu, na-recover sa estudyante sa buy bust operation sa Pototan

ILOILO — Masobra P1 million nga balor sang suspected shabu ang na-recover sa estudyante nga nadakpan sa drug buy bust operation sa Barangay Rumbang, Pototan kahapon, Oktubre 25.

Ginkilala ni Police Major Roy Tayona, hepe sang Pototan Police Station kay Lance Florida, 21, sang Rizal Street, Pototan ang nadakpan sa operasyon.

Nakuha kay Florida ang 150 gramos sang suspected shabu nga may market value nga P1,000,020.00. Suno kay Tayona, ginakabig nga high-value target individual ang subject.

Gin-conduct sang mga personnel sang Iloilo Provincial Drug Enforcement Unit kag Pototan police ang operasyon.

Ginpanginwala naman sang subject nga iya ang na-recover nga suspected drugs. Preso siya subong sa Pototan Police Station.

Base sa impormasyon ni Tayona, naga-eskuwela si Florida sa Alternative Learning System (ALS) sa Pototan.