P20K, isa ka sako sang bugas, ihatag sang Iloilo Provincial Goverment sa mga apektado sang ASF sa Oton kag San Miguel

Plano ni Iloilo Governor Arthur Defensor, Jr. nga hatagan sang P20,000 kag isa ka sako sang bugas ang mga pamilya nga naapektuhan sang African Swine Fever (ASF) ang ila ginasagod nga baboy.

Suno kay Provincial Veterinary Office Head Dr. Darel Tabuada, ginapangitaan sang gobernador sang pamaagi kun diin pagakuhaon ang budget para sa financial assistance.

Ginpasalig ni Tabuada nga magahatag sang bulig ang Iloilo Provincial Government ilabe na gid sa mga backyard hog raisers nga nadulaan sang palangabuhian bangud sa ASF.

Suno naman kay Governor Defensor, Jr., mahimo man nga makabaton sang dugang nga P10,000 ang mga apektado sang ASF nga magahalin sa Assistance to Individuals in Crisis Situation (AICS) sang Provincial Social Welfare and Development Office (PSWDO)

Ginbuyagyag man ni Tabuada nga madamo gihapon sang backyard farmers ang naga-resist nga i-depopulate ang ila ginasagod nga mga baboy apang nagapadayon ang paghaylo sa ila sang Provincial Veterinary Office.