ICPO preparado na para sa All Saints’ kag All Souls’ Day
ILOILO CITY – Nakahanda na ang puwersa sang Iloilo City Police Office sa pagbantay sang kalinong kag katawhay sa All Saints’ Day kag All Souls’ Day sa November 1 kag November 2.
Suno kay ICPO Director Police PCOL Leo Batiles, mabutang sila sang help desk sa entrance sang mga patyo sa siyudad.
I-check man ang mga gamit nga ginapasulod sa mga patyo, lakip na ang COVID-19 vaccination card. Ini bangud may mandu si Mayor Jerry Treñas nga pahanugutan lang nga makasulod sa mga patyo sa Oktubre 31 tubtob Nobyembre 2 ang mga fully kag partially vaccinated batok sa COVID-19.
Ginpahanumdom ni Batiles nga indi puwede dal-on sa sulod sang patyo ang makahulubog nga ilimnon, flammable materials, firearms kag mga matalum ukon mataliwis nga bagay.
Maga-umpisa ang deployment sang mga pulis sa patyo sa Oktubre 28.