Pagsuksok sang face mask sa indoor spaces sa Iloilo City, mangin ‘voluntary’ na

ILOILO CITY — Mangin boluntaryo na lang ang pagsuksok sang face mask sa outdoor kag indoor spaces sa Iloilo City.

Ini kasunod nga gin-aprubahan sang Iloilo City Council ang pag-amend sa Face Mask Ordinance sang siyudad nga nagamandu sang pagsuksok sang face mask bangud sa COVID-19 pandemic.

Base sa resolution ni Councilor Ely Estante, author sang Face Mask Ordinance, iya ginabasehan ang executive order nga ginpirmahan ni President Ferdinand Marcos, Jr. kag Iloilo City Mayor Jerry Treñas nga nagamandu nga mangin voluntary ang pagsuksok sang face mask sa indoor kag outdoor spaces.

Nagapati naman siya nga ang boluntaryo nga pagsuksok sang face mask ang mangin palaagyan sa amat-amat nga pag-transition pakadto sa “new normal.”

Ginahaylo naman sa gihapon Estante nga magapadayon sa pagsuksok sang face mask ang mga senior citizens; wala pa mabakunahan sang COVID-19 vaccines; kag mga may balatian.

Mangin mandatory naman ang pagsuksok sang face masks sa mga medical health facilities, medical transport vehicles kag public transportation.