Pagbutang sang temporary oil depot sa Antique port, ginakonsiderar

Ginakonsiderar ni Antique Governor Rhodora Cadiao nga magpahamtang sang barge agud mangin temporaryo nga oil depot sa MARINA port sa San Jose agud butangan sang mga naga-abot nga supply sang gatong.

Ini samtang ginakaayo pa ang taytay sa nagluy-on nga Oyungan Bridge sa Miagao nga mayor nga dalan halin sa Antique pakadto sa Iloilo.

Suno kay Cadiao, sunod-sunod ang pag-abot sang supply sang petroleum products para sa probinsya halin sang Biyernes gani mas maayo kun may oil depot.

Kinahanglan lang suno sa iya nga bantayan sang taga-Bureau of Fire Protection ang oil depot bangud madamo sang pamalay malapit sa Antique port.

Magluwas sa Oyungan bridge, indi man makadiretso sa sur ang mga madul-ong sang supply halin sa Aklan bangud na-utod ang Paliwan bridge sa Laua-an nga naga-angut sa Bugasong.