Mag-utod nga Palomar napasakaan na sang kaso may kaangtanan sa inaway vs mga Palomaria sa Passi City
ILOILO — Napasakaan na sang kaso ang mag-utod nga Ronald kag Sergeant Razel Palomar kasunod sang kinagamo nga natabo sang Sabado, Nobyembre 26.
Suno kay PLtCol Dennis Pamonag, hepe sang Passi City Police Station, ginpasakaan sang kaso nga murder si Ronald nga nakabuno patay kay Greg Palomaria samtang 3 counts sang frustrated murder ang ginpasaka batok kay Sergeant Palomar nga nakatiro kay Greg Junior, iya utod nga si Mark kag pakaisa nga si alyas Rolly nga menor-de-edad.
Ginpahayag ni Pamonag nga na-establisyar nila nga si Ronald ang nakabuno patay kay Greg nga nakaagum sang pilas sa nagkalain-lain nga parte sang lawas.
Base naman sa pag-imbestigar sang pulis, si Sergeant Palomar ang nakatiro sa tatlo pa ka biktima.
Na-recover sang pulis ang pusil ni Sergeant Palomar kag kutsilyo nga gingamit sang krimen.
