BM Rolly Distura nagpasar sang 2 resolutions may kaangtanan sa Ungka Flyover
ILOILO — Duha ka mga resolutions ang ginpasar ni 4th District Board Member Rolly Distura nga chairman sang Committee on Infrastructure sa Sangguniang Panlalawigan kadungan sang iya privilege speech may kaangtanan sa problema sa Ungka Flyover.
Una amo ang “naga-strongly request” kanday DPWH Sec. Manuel Bonoan kag sa director sang Bureau of Design sang DPWH central office nga magpaguwa gilayon sang disenyo agud may basehan sa mangin pinal nga solusyon sa Ungka Flyover.
Ikaduha, nagahingyo kanday Iloilo City Cong. Julienne Baronda, 2nd District Cong. Mike Gorriceta, kag Uswag Ilonggo Party-list Rep. Jojo Ang nga maghimo sang representation sa nasyonal nga lebel para mapadasig ang pag-address sa problema sa Ungka Flyover kag mahatagan ini sang pemanente nga solusyon.
Gin-ako ni Distura nga indi siya komporme sa sulat nga ginpadala ni DPWH 6 Asst. Regional Dir. Jose Al Fruto bangud base sa ila nakasugtan sa joint committee hearing, regular nga mapadala sang update ang DPWH 6 apang sang nagligad nga semana lang sila naka-submit.
Ginpaathag man ni Distura sa taga-DPWH 6 nga dapat may manabat sa delay nga pagbukas sang Ungka flyover.