Vertical Clearance ginbutang sa entrance sang Ungka Flyover
ILOILO – Nagpahamtang sang vertical clearance sa approach sang Ungka Flyover ang DPWH 6 agud nga dumilian ang paglabay sang mga 10-wheeler trucks kag dalagku nga big trucks sa flyover.
Ginabanta 12 ka tapak ang kataason sang vertical clearance.
Suno kay Pavia SB Member Jose Maria “Pyt” Trimañez, nakamuno sa iya si Department of Public Works and Highways (DPWH) 6 Assistant Regional Director Engr. Jose Al Fruto nga light vehicles lang ang pahanugutan nga makalabay sa flyover.
Ginpahayag pa ni Trimañez nga kun buksan na ang flyover kinahanglan pa nga obserbahan ang trapiko.
Una na nga ginpahayag ni Fruto sa committee inquiry nga ginpatawag ni Iloilo City Councilor Johnny Young nga wala sang load limit ang Ungka Flyover bangud nga bukas ini sa ano man nga salakyan.
Setyembre 18, 2022 sang temporaryo nga ginasirado sa trapiko ang flyover bangud sa nakita nga vertical displacement ukon pag-usmod. – via Cedrick Anona