Roxas City, Capiz naka-record sang labing una nga kaso sang bird flu

CAPIZ — Ginpasiguro sang Roxas City Government sa publiko nga nagahimo sila sang preventive measures batok sa Avian Influenza Virus ukon Bird Flu.

Ini ang pahayag ni Roxas City Mayor Ronnie Dadivas paagi sa ginpaguwa nga statement sang may nagpositibo nga swab samples sa Avian Influenza Virus Type A, Sub-type H5N1 ukon mas kilala nga bird flu sa Barangay Cagay, Roxas City, base sa resulta nga ginpaguwa sang Bureau of Animal Industry- Veterinary Laboratory Division.

Suno kay Dadivas, malayo sa pamalay kag nahamtang sa isolated area ang poultry farm nga may bird flu.

Kasunod sini, ginpamatay kag ginlubong ang 126 ka layer hens, native nga manok, kag mga pato sang gintukod nga Roxas City Avian Influenza Response Team kaupod ang taga-Department of Agriculture, Capiz Provincial Veterinary Office, kag mga barangay officials.

Naghimo man sang disinfection sa poultry farm.

Ginhugot pa ang seguridad sa lugar agud wala sang makasulod.

Nagapadayon ang monitoring sang Roxas City Veterinary Office kaupod ang DA agud indi maglapta ang virus kag malikawan ang transmission.

Ang Bird Flu makalalaton nga balatian nga tuga sang influenza virus nga naga-apekto sa madamo nga species kaangay sang manok, pabo, pugo, guinea fowl kag bisan sa pet birds kag wild birds. –via Ronnie Dadivas/ FB