Guimaras naka-record sang labing una nga kaso sang ASF

GUIMARFAS – Positibo sa African Swine Fever virus ang specimen samples nga nakolekta sa Barangay Sawang, Buenavista, Guimaras nga gin-test sang Regional Animal Diseases Diagnostic Laboratory sang Department of Agriculture-Western Visayas.

Gin-anunsyar ini sang DA-WV kahapon, Disyembre 16.

Suno kay Engr. Jose Albert Barrogo, OIC-Regional Executive Director sang DA-WV, nakapakigsapol na sila sa mga opisyal sang Guimaras Provincial Government sa pagpanguna ni Governor JC Rahman Nava kahapon sang nabaton ang resulta sang lab test.

Nagpaguwa si Gov. Nava sang Executive Order No. 118 series of 2022 nga nagamandu sang temporaryo nga pag-ban sang swine, pork, pork products and by-products halin kag pasulod sa Buenavista.

Dugang ni Engr. Barrogo, naga-coordinate sila sa Buenavista LGU sa ginapatuman nga ASF protocols sa sulod sang 500-meter radius kag 1-kilometer radius halin sa infected area agud gilayon nga ma-contain ang virus kag indi na maglapta.

Gina-encourage sang DA ang mga hog farmers, agricultural extension workers kag stakeholders sa Guimaras nga gilayon mag-report sa ila tagsa ka municipal agriculture office kun may mahibaluan nga baboy nga gulpi mapatay ukon magbalatian.

Naga-apelar man si Barrogo sa publiko nga indi mag-panic kundi magsunod sang ASF protocols. Mas maayo man suno sa iya nga magbakal sang baboy nga nakaagi inspect sang taga-National Meat Inspection Service. – via DA-WV