12 ka balay nasunog sa Compania Central, Molo
ILOILO CITY – Nagpaligad sang gab-i sa evacuation centers ang mga nasunugan sa Zone 1, Barangay Compania Central, Molo kahapon, Disyembre 20
Base sa data sang City Social Welfare and Development Office (CSWDO), siyam ka balay ang naupos gid, samtang tatlo ang partially damaged sa sunog.
Nagapadayon pa ang pag-account sang CSWDO kun pila gid ang apektado nga mga pumuluyo nga nagatiner subong sa barangay hall, chapel, kag day care center. Wala sang may napilasan ukon casualty sa sunog.
Suno kay CSWDO Head Terry Gelogo, preparado na ang food packs kag non-food items nga ihatag sa mga nasunogan nga residente lakip na ang mga boarders.
Magluwas diri, mahatag man ang Iloilo City Government sang P10,000 nga financial assistance sa mga pamilya nga natupok ang balay, kag P7,000 sa mga partially damaged.
Nagapadayon pa ang imbestigasyon sang Bureau of Fire Protection (BFP)- Iloilo City kun ano gid ang ginhalinan sang kalayo kag kun pila ang kahalitan sang sunog.