Iloy sang 6 ka tuig nga bata nga babaye nga nasapwan patay sa Estancia nagpanawagan sa suspect nga mag-surrender

ILOILO — Nagahilibiun nga nagpanawagan sa suspect ang iloy sang anum ka tuig nga bata nga babaye nga nasapwan nga patay kag wala na sang pang-idalum nga panapton sa Brgy. Gogo, Estancia nga mag-surrender kag atubangon ang iya ginhimo.

Suno sa iloy nga si Raquel Mahinay, ginbululigan pa sang mga residente pangita ang iya bata nga si Jacqueline sang wala siya makapauli upod sa iya mga magulang.

Mga las-8 sang Lunes sang gab-i (Disyembre 19) sang may nagpahibalo sa iya nga nakita na ang bata malapit sa tower sang cell site. Wala na sang pang-idalum nga panapton ang bata kag may pilas sang pagkalampos sa ulo.

Antes sini naghampang sa eskwelahan ang bata kag nakapauli pa sa ila balay para mag-ilis sang nabasa ang iya nga bayo. Nagpangayo pa siya sang lima ka piso sa iya iloy agud ibakal sang tinapay antes magbalik sa eskwelahan.

Wala pa sang may makatudlo kun sin-o ang ulihi nga nakaupod sang bata antes siya nasapwan.