Dumangas, Barotac Nuevo nadugang sa mga banwa nga gin-classify nga Red Zone bangud sa ASF
ILOILO — Nadugang ang Dumangas kag Barotac Nuevo sa kabanwahanan nga gin-classify nga red zone bangud sa African Swine Fever (ASF).
Sa section 1 sang Executive Order 460-F [An order further amending Executive Order 460] nga naga-implementar sang adjusted quarantine measures batok sa virus, indi na pagpahanugutan ang pagpaguwa sang buhi nga baboy; pork; pork products kag semilya halin sa nasambit nga banwa pakadto sa iban nga areas.
Padayon naman nga gina-monitor sang Provincial Veterinary Office (PVO) ang kaso sang ASF sa probinsiya.
Nagpositibo ang blood samples sang baboy sa Barotac Nuevo kag ginsundan naman sang duha ka mga baboy sa Dumangas.
Gilayon nga ginadeklarar ang Red Zone sa kabanwahanan nga may duha ukon masobra pa ka barangay nga kumpirmado nga may ASF.
Sa record sang PVO magluwas sa Dumangas kag Barotac Nuevo yara man sa red zone ang Oton; San Miguel; New Lucena; Santa Barbara; Leganes; Alimodian kag Mina.
