Pagmahal sang bombay may epekto sa food establishments –Ilonggo chef Mico Villasis

ILOILO CITY – Apektado ang mga pagluto sang mga Filipinos sa pagmahal sang presyo sang bombay.

Suno kay Chef Mico Villasis nga resident chef sang Cafe Aroma, pareho nga ingredient kag condiment ang bombay kag ginakabig nga commodity ilabe na sa mga Filipinos.

Bangud sa pagtimbuok sang presyo sang bombay, ginalimitahan suno sa iya ang paggamit sini sa pagluto. “Pinoy kita, ang taste buds ta sanay na sa onions. Indi mo na siya masaboran sa una pero kun wala na siya, makahambal ka nga ‘daw may kulang gid ya’.”

May substitute man suno sa chef sa bombay nga makita subong sa mga merkado nga amo ang shallots nga pareho nga species sang red onion “pero flavor-wise lain gid na sila nga duha. Ang red onion may kahang siya gamay. Ang shallots naman ya very mild ang flavor kag daw wala sang kahang kun magkagat ka.”

Puwede man ma-substitute ang sibuyas dahon nga wala nagalayo ang panabor sa bombay, suno sa chef.

Sa panan-awan ni Villasis, pinaka-apektado sang pagmahal sang bombay ang magagmay nga business owners, pero nagahimo man sang adjustments ang dalagku nga food establishments.

“Sa food business the most affected gid ang mga small business owners. Ang matabu dira ma-adjust sila sa price sang pagkaun nila or maiban sila sa pagbutang sang sibuyas. Sa dalagku nga food establishments ang mahimo na lang nila is maiban na lang sa pagbutang like sa amon kay indi kami maka-price increase dayon tungod lang sang isa ka produkto,” suno pa sa chef.

Ginalauman naman ni Chef Villasis nga maganubo ang presyo kun may harvest na sang bombay subong nga bulan. –via Aksyon Hotline