‘Inappropriate temperature’ posible rason sang pagsigabong sa Regional Explosive Ordnance and Canine Unit

ILOILO CITY –Inappropriate temperature sa sulod sang storage facility ang posible rason sang pagsigabong sa opisina sang Regional Explosive Ordnance Disposal and Canine Unit sa Iloilo City Police Office compound kahapon sang aga, Enero 8.

Suno ini kay ICPO Spokesperson PMAJ Shella Mae Sangrines, base sa initial assessment ni PMAJ Serafin Jun Reyes, chief sang RECU 6.

Sa paathag ni Reyes, wala nagakaigo ang temperature sa sulod sang storage facility nga posible nag-trigger sang silver nitrate, ang low explosive powder nga ginagamit sang mga EOD personnel sa training, nga magsigabong. Yara dapat sa 23 tubtob 25 degrees Celsius ang temperature sa sulod sang facility.

Samtang, nagpadulong sa ICPO si Police Regional Office 6 Director PBGEN Leo Francisco agud i-check ang sitwasyon.

Nagpasalamat si Francisco nga wala sang may napatay kag wala man nagsigabong ang iban nga explosives. Na-istoryahan suno kay Francisco ang pagpatindog sang separado nga opisina para sa EOD agud indi masulit ang kapareho nga insidente. –via PRO 6/Aksyon Reports Morning Edition