1 patay, 3 pilason sang nagbungguanay ang 2 ka motorsiklo sa Valderrama, Antique

ANTIQUE—Isa ang napatay samtang tatlo ang pilason sang nagbungguanay ang duha ka motorsiklo sa Brgy. Ubos, Valderrama las-7:55 kagab-i.

Ginkilala ang napatay kay Elisito Manuel, 19-anyos nga driver sang isa ka motorsiklo. Minor naman nga pilas sa ulo ang naagum sang pakaisa niya nga menor-de-edad nga angkas sang motorsiklo. Lunsay sila residente sang Brgy. Igsoro, Bugasong.

Pilas naman sa ulo ang naagum sang mag-utod nga sakay sang isa pa gid ka motorsiklo nga ginkilala kanday Jesoron, 24, kag Genisis Baligyan, 28, sang Brgy. Bagtason, Bugasong.

Suno kay Police Captain Ephraime Udani, Hepe sang Valderama Antique Police Station, halin sa proper sang Valderama ang motorsiklo nga ginasakyan sang mag-utod nga Baligyan samtang yara naman sa opposite nga direksyon ang isa ka motorsiklo.

Ginpahayag sang police nga nag-overtake ang motorsiklo sang mag-utod sa ginasundan nga salakyan kag nakabunggo sa kasugata nga motorsiklo nga ginamaneho ni Manuel.

Nagkalaguba gid ang duha ka motorsiklo samtang nagtabog ang mga helmet sang mga sakay nga ginapatihan sang police nga posible wala ma-lock sang ila ginsuksok.

Ginahibalo naman sang police kun naka-inom sang makahulubog nga ilimnon ang mga na-aksidente.