Bedridden nga senior citizen patay sa sunog sa Oton

ILOILO — Wala nahingagaw nga maluwas sa nasunog niya nga balay ang 74-anyos nga lalaki sa Brgy. Botong Oton, pasado las-2 kahapon sang hapon, Marso 22.

Ginkilala ang napatay kay Thomas White nga isahanon na lang nga nagatenir sa iya nga balay kag ginadul-ungan lang sang pagkaon sang iya hinablos.

Magluwas sa balay ni White nasunog man ang duha ka mga balay nga ginapanag-iyahan ni Pedro Germalino.

Suno kay SFO4 Reggie Semion sang Bureau of Fire Protection-Oton, sa balay ni White nag-umpisa ang kalayo pero padayon pa ang ila imbestigasyon kun ano ang rason sang sunog.

Totally-burned ang duha ka balay kag partially-damaged naman ang isa.

Ginabanta sa P306,165.00 ang kahalitan sa sunog.

Samtang, nagapangabay naman si Punong Barangay Rehum Torre sa iya mga pumuluyo nga mag-aligmat tungod sa tuman ka init nga panahon.