Driver pilason sang nahulog sa ginamaneho nga 6-wheeler truck sa taytay sa Dumangas

ILOILO — Pilason ang driver sang nahulog ang 6-wheeler truck nga iya ginamaneho sa taytay sa Brgy. Balabag, Dumangas kahapon, Mayo 15.

Ginkilala ang driver kay Lando Billones, 39-anyos.

Suno kay Police Staff Sergeant John Mark Tuazon, imbestigador sang Dumangas Municipal Police Station, nagkarga sang mga bato ang truck sa idalum sang taytay.

Ginpabutyag sang driver suno sa pulis nga nagapasaka na siya kuntani sa national highway apang nagbisyo ang preno sang salakyan rason nga nag-atras kag nahulog sa idalum sang taytay.

Gilayon nga gindala sa ospital ang biktima.