Petition, open letter nga nagahingyo nga imbestigaran ang Ungka flyover ipadala sang grupo nga I-ACT sa Kongreso
ILOILO – Mapadala sang open letter ang Ilonggos for Accountability and Transparency (I-ACT) sa House of Representatives kag Senado nga magahingyo nga imbestigaran ang kontrobersiyal nga Ungka Flyover.
Ini agud may manabat sa palpak nga proyekto nga nagapaantos sa mga Ilonggos, suno kay Mrs. Irma Espinosa, convener sang I-ACT.
“Ang rekomendasyon mismo sang third party consultant nga dapat may repair naman [sa Ungka Flyover] nga himuon nga naga-amount sang P250 million. Ang panawagan ‘ya sang Ilonggos for Accountability and Transparency before ina siya ma-repair, dapat ang ini’ng P680 million nga gingasto sang mga pumuluyo dapat may manabat sini, sa sini’ng kapalpakan sa construction sang Ungka Flyover; DPWH man ini siya ukon contractor man ina,” suno kay Espinosa.
Ipadala ang sulat sa House Committee on Public Works and Highways, pila ka mga kongresista, kag kay Senate President Miguel Zubiri.
“2022 pa ini siya nga supposed to be napuslan na naton ini’ng flyover however, tungod sang kapalpakan sini, madamo sang aton mga pumuluyo nga naapektuhan sini,” suno kay Espinosa.
Magluwas sa open letter, ginpahayag ni Espinosa nga mapadala man sang petition letter ang ila grupo sa mga kongresista nga may pirma sang mga Ilonggos bilang panawagan nga imbestigaran ang kontrobersiyal nga flyover kag pasabton ang mga involved sa kapalpakan sini.
Nagalibot sa mga merkado kag terminals ang grupo agud makatipon sang pirma sang mga Ilonggos.
Gingastuhan sang P680 million ang pagpatindog sang Ungka Flyover kag nagdugang sang indi magnubo sa P13 million para sa third party consultant agud imbestigaran ang pag-usmod sini.
Nagakinahanglan naman sang indi magnubo sa P250 million agud kay-uhon ang flyover tungod naga-usmod ang tanan nga 16 ka haligi.