5 dakup sa drug buy bust operation sa drug den sa Desamparados, Jaro

Read Time:1 Minute, 36 Second

ILOILO CITY — Lima ang nadakpan nga ginalakipan sang duha ka High Value Individual (HVI) kag tatlo ka Street Level Individuals (SLI) sa drug buybust operation sa gin-abandonar nga balay sa Desamparados, Jaro kagab-i, Mayo 27.

Ginkilala ang subject sang operasyon kay Romer Castor alias Pakloy, 47-anyos sang Tabuc Suba, La Paz.

Nadakpan man kanday alias Toto Gabrillo, 25-anyos sang Brgy. San Roque, Jaro nga HVI; Felix Sabandal alias Amay, 37-anyos sang Brgy. Arbesanches, San Miguel; Mark David Mahusay, 25-anyos sang Brgy. Tab-ang, Bayawan, Negros Occidental; kag Jun Ong, 35-anyos sang Brgy. Tanza Bonifacio, City Proper nga lunsay SLI.

Suno kay Iloilo City Police Office (ICPO) Police Colonel Joeresty Coronica nga masobra duha ka bulan nga gin-surveillance ang lugar antes nahimo ang operasyon.

Ginpabutyag ni Coronica nga si Pakloy ang nagatiner sa lugar kag kun indi niya kilala ang nagabakal, tubtob lang sa gate ang “pagdaho” sang kwarta kag illegal drugs. Samtang kun kilala naman niya ang nagabakal, ginapasulod niya sa lugar kag ginahatag ang drug items.

Ginpahayag naman ni Police Lieutenant Colonel Antonio Benitez Jr., OIC sang City Drug Enforcement Unit (CDEU) nga Marso sang gin-report sa ila ang illegal activities sa lugar kag paagi sa ila pag-verify, may nadakpan man sila sadto nga nagabaligya sang druga sa amo man nga lugar.

Tuyo pa nga magpalagyo sang mga arestado, pero nadakpan sang police tungod napalibutan na nila ang balay suno kay Benitez.

Na-recover sa operasyon sang CDEU subong nga gab-i ang walo ka sachets sang suspected shabu nga ginabanta may standard drug price nga P782, 000; P20,000 buy bust money; kag mga drug kag non-drug paraphernalia.

Sa subong, may impormasyon sila nga nabaton nga ginakuha ni Pakloy ang illegal drugs kay alias “Madam” nga taga-syudad.

Gintinguhaan sang Aksyon Radyo Iloilo News team nga makuhaan sang pahayag ang mga arestado pero wala nagasabat.