Iloilo City Legal Office ginarekomendar sa ICPO nga ipatuman sang traffic enforcer ang ordinansa sang siyudad may kaangtanan sa confiscation sang driver’s license

Read Time:1 Minute, 18 Second

Ginarekomendar sang Iloilo City legal office sa City Police Office nga i-implementar sang traffic enforcer ang City Regulation Ordinance No. 338 sang syudad may kaangtanan sa pagkumpiskar sang driver’s license sang traffic violator.

Ini suno kay ICPO director Police Colonel Joeresty Coronica sang nag-request siya sang legal opinion sa City legal office agud maklaruhan sila sa pagsulundan sa trapiko sa syudad.

Ginpabutyag ni Coronica nga, “Isa sa mga recommendations nila (City legal office), the traffic enforcer will implement city ordinance 338 by requiring driver nga nag-violate to surrender his or her license. Kun mag-refuse ang driver, ang Obrahon sang traffic enforcer is to make a report to the city legal office within the day.”

Gindugang ni Coronica nga pagkatapos sang 48 oras nga indi mabayaran sang traffic violator ang iya nga violation, pasakaan siya sang kaso sang taga-City legal office.

Ginahulat naman ni Coronica ang opinyon sang legal service sang Police Regional Office (PRO) 6.

Nagpangayo sang legal nga opinion ang ICPO sa tungod “conflicting” ang direktiba nga nag-abut sa ila halin sa Secretary of the Interior and Local Government (SILG) kag ang local ordinance nga ginapatuman sa syudad.

Ginpabutyag ni Coronica nga sa Regulation Ordinance No. 338, gina-otorisar ang mga pulis kag traffic aides nga magkumpiskar sang driver’s license sang traffic violator samtang may yara naman sang memorandum ang SILG nga nagahambal nga maka-issue lang sang citation ticket ang local government units samtang Land Transportation Office (LTO) kag ila deputized agents lang ang makakumpiskar sang mga lisensya.