Dinagyang 2020 Update: Merry making ukon pagsadsad sa Dagyang sa Calle Real, ginalauman nga pasakupan sang madamo nga grupo – IFFI
By: Aine Grace Bravo | January 15, 2020
via Jeremae Ventar
Iloilo City — Lauman nga madamo ang merry-making ukon sadsad sa Dagyang sa Calle Real sa Enero 25, isa ka adlaw antes ang highlight sang Dinagyang Festival 2020.
Suno kay Mr. Philipp Chua sang Iloilo Festivals Foundations, Incorporated, magluwas sa siyam ka barangay tribes, 25 pa gid ang nagkumpirmar nga mapasakup sa Dagyang sa Calle Real.
Pwede maka-upod bisan sin-o lang suno kay Chua, kag indi man kinahanglan nga may costume.
Ang mapasakup sa Dagyang sa Calle Real, magalibot halin sa Plaza Libertad tubtob sa Solis Street halin las-otso sa aga tubtob las-6:50 sa gab-i nga amo naman ang pagsugod sang religious sadsad sa San Jose Parish Church.
Ginpahanumdom lang ni Chua nga ginadumilian ang paghaboy sang basura, mga bisikleta, floats kag pagpanigarilyo.