Bangkay Sang Ilongga OFW Nga Nasapwan Sa Freezer Sa Kuwait Pabalik Na Sa Pilipinas Subong Nga Adlaw

Kuwait – Pabalik na sa Pilipinas ang bangkay ni Joanna Demafelis, ang Ilongga OFW nga nasapwan sa sulod sang freezer sa Kuwait.

Sa Facebook video post ni Charge d’Affaires Elmer Cato sang Philippine Embassy sa Kuwait, makita ang pagtigub kahapon sang mga miembro sang Filipino Community kag nagpangamuyo para kay Demafelis. Pagkatapos sang pangamuyo, ginselyuhan ang lungon sang OFW kag ginbiyahe na pabalik sa pungsod.

Ma-abot sa Manila ang bangkay subong nga aga kag buwas sa kaagahon, ibiyahe naman pa-Iloilo kag i-diretso sa ila balay sa Barangay Ferraris, Sara.

Nagpasalig suno kay Cato ang Kuwaiti authorities nga himuon ang tanan agud mahatagan sang hustisya si Demafelis nga nag-abroad agud kuntani mahatagan sang maayo nga kabuhi ang iya pamilya ilabe na ang iya ginikanan.

Ginpahayag sang Kuwaiti authorities nga posible ara lang sa Lebanon ukon Syria ang primary suspects sa pagpatay kay Demafelis nga iya amo nga Lebanese kag asawa sini nga Syrian.

Tuman ka sakit suno kay Cato sang natabu kay Demafelis nga base sa autopsy result, nabalian sang gusok, naka-angkon sang contusion, trauma sa pelvis kag kidney area kag naka-experyensyan sang internal bleeding. Madamo man sang nakita nga pilas sa lawas sini. Sa imbestigasyon sang mga otoridad, patay na ang Pinay worker sang ginsulod sa freezer isa ka tuig na ang nakaligad.

(ATT)