By: Aine Grace Bravo
Wala sang kamatuoran nga nagabaton sang payola halin sa illegal gambling lord si Mayor Vicente Escorpion sang Igbaras.
Reaksyon ini sang alkalde kasunod sang ginbuyagyag ni former Congressman Oscar Garin nga may mga alkalde kag chiefs of police sa first district nga nagabaton sang pahamham halin sa nagapadalagan sang illegal nga pasugal. Suno sa alkalde, wala gid sang nag-attempt nga magsuhol sa iya kag wala man siya sang plano nga magbaton.
Apang gin-ako ni Escorpion nga nagapadayon ang sugal sa banwa bangud ginasuportahan man sang mga tawo. Madamo suno sa iya sang nagakaganyat bangud masami nga nagadaug gani nagataya gihapon bisan nabal-an nga ilegal ang sugal.
Ginpabutyag naman ni Mayor Suzette Alquisada sang Tigbauan nga wala siya sang ihibalo kon sin-o ang mga operators sang ilegal nga pasugal sa banwa. Ginpanghiwala man sini nga nagabaton siya sang payola kada bulan agud pasugtan ang ilegal nga aktibidad.