Iloilo City: Ginbanta P600,000 nga balor sang illegal drugs, nakumpiskar sa buybust operation sa Manduriao

By: Aine Grace Bravo

Ginabanta sa P600,000 nga balor sang illegal nga druga ang nakumpiskar sang mga operatiba sang Philippine Drug Enforcement Agency (PDEA) 6 kag Iloilo City Police Office sa balay sang ginatudlo drug personality sa Barangay Bakhaw, Mandurriao kahapon.

Suno kay PDEA 6 Director Paul Ledesma, nagalab-ot sa 100 ka gramo sang suspected shabu kag mga drug paraphernalia ang nakuha sa balay sang subject nga si Nebin Degeron alyas Jun-Jun. Wala nadakpan si Degeron matapos nagpalagyo paagi sa paglangoy sa mahigku nga tubig sang suba.

Na-aresto naman ang anum nga natabuan sa sulod sang balay ni Degeron nga ginalakipan nanday Carlo Dave Lorque, 19-anyos sang Brgy. Mandog, Maasin; Emmanuel Anatan, 31-anyos sang San Juan, Molo; Wilson Flor, 52-anyos sang Bakhaw, Mandurriao; Jerson Palabrica, 30-anyos sang Rizal Pala-Pala Dos, City Proper; Joven Manias, 23-anyos sang Bitoon, Jaro; kag Reden Muege, 20-anyos sang Poblacion West, Oton.

Preso na sa karsel sang PDEA 6 ang mga nadakpan kag natalana ipa-drug test.