Estudyante, patay matapos ginbuno sang iya classmate sa sulod sang eskwelahan!

Iloilo City–Patay ang first year HRM student sang Cabalum Western College sang ginbuno sang iya classmate sa sulod sang eskwelahan sa Iznart Street, City Proper kahapon sang aga.

Gindala pa sa Iloilo St. Paul’s Hospital si Jay Mark Barlan sang Barangay Mapili, San Enrique apang napatay bangud sang pilas sa wala nga parte sang tiyan. Nagapasulod ini sa classroom sang ginsugata ni Allison Hecita sang Boulevard, Molo. Nakita sang mga classmates sang duha nga naghakyaw si Hecita kag nag-isol ang biktima kag nagdalagan sa ground floor tubtob natumba sa administration building.

Ulihi pa nga nakita nga may pilas ang biktima nga ginhingagaw dala sa ospital. Nagsurrender sa gwardya sang eskwelahan ang suspek nga ginpreso sa karsel sang Police Station 1. Base sa imbestigasyon, masami nga gina-bully sang biktima ang suspek. (Aine Grace Bravo)