UPDATE: Problema sang mga municipal employees sa Maasin, ginpatung-an nanday Gov. Arthur Defensor kag DILG Provincial Director Theodora Sumagaysay

Maasin, Iloilo–Nagdayalogo kahapon sanday Governor Arthur Defensor, DILG Provincial Director Theodora Sumagaysay kag mga opisyal sang Maasin agud hambalan ang problema sa suweldo sang mga empleyado sang munisipyo halin Setyembre 15 tubtub 30.

Suno kay Maasin SB Member Vicente Albacete, nakasugtan nga hatagan nila sang otoridad ang gindesignar nga municipal treasurer nga mangin signatory sa bangko tubtob Disyembre 31 subong nga tuig. Buwas, natalana nga maghiwat sang special session ang sanggunian sang Maasin para mahatagan sang otoridad si Analyn Amboy kag ma-release naman ang suweldo sang mga empleyado.

Magluwas kay Albacete, nagtambong man sa dayalogo sanday Vice Mayor Rene Mondejar, kag SB members Inocencio Velasco kag Ritchel Mondejar. Nagapati ang grupo sang bise alkalde nga mahimo ma-manipular sang alkalde ang treasurer kabangdanan hugot nila ginpamatukan si Amboy nga asawa sang SB member kag kaalyado ni Mayor Mariano Malones. Ang bana ni Amboy ang gin-alegar may plano magkandidato sa pagka-bise alkalde sa masunod nga eleksyon. (Aine Grace Bravo)