Tampad nga driver sang Light of Glory taxi, ginhatagan sang padya sang LTFRB bangud sa pagbalik sang bag nga may unod nga kuwarta sa pasahero nga OFW!

Iloilo City — Ginhatagan sang padya sang LTFRB 6 ang tampad nga driver sang Light of Glory taxi nga nagbalik sang bag sang pasahero nga OFW sang Disyembre 18.

Nakabaton sang P10,000 nga padya si Anselmo Nava, 56-anyos sang Barangay Duran, City Proper halin kay LTFRB  6 board member Ariel Inton.

Ginbalik ni Nava ang nabilin gna bag ni Mark Nieves, ang OFW nga nagsakay sa iya taxi halin sa Iloilo Airport padulong sa Miag-ao.

Wala gid gin-interesan ni Nava ang bag ni Nieves nga naga-unod sang 5,270 euros ukon masobra sa P300,000.

Suno kay LTFRB 6 legal counsel Atty. Jose Marie Lamparero, nakalab-ot sa ila atensyon ang katampad ni Nava maapos nakita sa Facebook ang litrato sang driver kag gin-share sa iya account kag nakita naman ini ni LTFRB board member Ariel Inton.

Halin mismo suno sa iya sa bulsa ni Inton ang kuwarta nga ginhatag sini kay Nava.

Dugang ni Lamparero, nagpatawag sang press conference si Inton agud ipahibalo sa publiko nga may mga tampad pa nga taxi driver kag mahaylo man ang iban nga driver nga pamarisan si Nava.

Ginpahayag nga indi ini ang una nga tion nga may ginbalik nga mga pagkabutang si Nava nga nabilin sa ginamaneho nga taxi. (JoMaque)