Taxi driver nga nag-ako nga nagsulod sa iya menor-de-edad nga pasahero sa lodging house, ginpasakaan na sang kaso

Iloilo City–Gin-file na kahapon ang kaso nga paglapas sa Republic Act 7610 ukon Special Protection of Children Against Abuse, Exploitation and Discrimination Act batuk sa taxi driver sang Arzea taxi nga gin-alegar nagdala sa 16-anyos nga pasahero nga babaye sa motel.

Sa alegasyon ni alyas Inday, nagsakay siya sa Robinsons’ Place area kag mapadul-ong sa Jaro sang nakita nga may ginspray ang taxi driver samtang nagabiyahe kabangdanan natulugan siya. Nabugtawan na lang ni Inday nga yara na sila sa garahe sang lodging house kabangdanan gin-ayo sini ang driver kag ginhingyo nga idul-ong siya sa Jaro. Gin-alegar pa sang biktima nga ginhimas sang driver ang iya nga paa kag naghingyo nga halukan siya sang nagapaguwa sila sa lodging house.

Nagtanyag ang driver suno kay Inday nga tudluan ini angut sa pagpakig-sex agud may itudlo man ini sa iya nobyo. Antes siya manaug, ginhatagan pa ini sang driver sang calling card. Ginplanuhan ni Inday kag sang iya mga abyan nga tawgan ang taxi driver kag ipadakup ini sa mga pulis.

Handa naman ang pamilya sang taxi driver nga atubangon ang kaso nga ginfile sang 16-anyos. Suno sa asawa ni Totong, makuha na lang siya sang abogado agud depensahan ang bana. Nagpangayo ang asawa sang despensa sa pamilya sang dalagita sa ginhimo sang iya bana. (Aine Grace Bravo)