Pavia police, padayon ang imbestigasyon agud makilala ang nagtiro patay sa duha ka empleyado sang distributor sang mga motorsiklo

Pavia, Iloilo–Gina-review sang Pavia police ang CCTV footage nga kuha malapit sa lugar sang shooting incident sa Barangay Anilao nga nagresulta sa kamatayon sang duha ka mga empleyado sang Motor Ace Philippines, Incorporated.

Tuyo sini nga mahibaluan kon nakalabay ang awto nga ginsakyan sang nagtiro patay kanday Michael Gavito, area supervisor sang Motor Ace kag mekaniko nga si Stephen Ylanan. Suno kay Inspector Rey Cordero sang Pavia Police Station, tinguhaan nila nga hibaluon ang plate number sang awto.

Ginpahayag nga wala gid sang may naka-identify sang awto bangud madasig ini nga nagpalagyo direksyon sang Poblacion, Pavia pagkatapos sang pagpangluthang.

Naabtan na lang sang mga barangay tanod sa Anilao nga duguon ang mga biktima kabangdanan gintawgan sang pulis kag gindala sa ospital.         Apang patay na sang nag-abot sa ospital si Gavito samtang napatay man si Ylanan samtang ginabulong kahapon sang kaagahon.

Away sa trapiko ang isa sa mga ginasunod nga motibo sa krimen. (Aine Grace Bravo)