Pagtaliwan ni Former Senator Miriam Defensor-Santiago, Daku nga Kadulaan sa mga Filipinos–Gov. Arthur Defensor

Iloilo–Daku nga kadulaan sa mga Ilonggos kag sa tanan nga Filipinos ang pagtaliwan ni former Senator Miriam Defensor-Santiago kahapon sa edad nga 71 bangud sang lung cancer.

Sentimento ini sang pakaisa ni Santiago nga si Governor Arthur Defensor. Ginpabugal sang gobernador nga siya ang pinakamalapit nga pakaisa sang anay senadora.

Suno kay Defensor, nangin proud ang mga Ilonggos bangud sa mga nalab-ut ni Santiago nga gintawag man ‘Iron Lady of Asia.’

Ginpabutyag sang gobernador nga nangin contribution ni Santiago nga dumdumon gid sang mga Filipinos ang iya wala untat nga away sa graft kag corruption, away sa mga tawo nga nagpangdaya sa pulitika kag sa mga nagapangawat sa kaban. Gintawag man ni Defensor nga maalam kag may prinsipyo ang anay senadora.

Si Santiago ang natawo sa Iloilo City sang Hunyo 15, 1945 kag kamagulangan sa pito ka mag-ulutod. Nakaserbe siya sa tatlo ka sanga sang gobyerno sa judicial, executive kag legislative. (AGB)