Drug supply sa Western Visayas, ginapaabot nga maganubo bangud sa kamatayon ni PDEA 6-identified drug group leader Richard Prevendido

Iloilo City — Ginapaabot nga maapektuhan ang drug supply sa Rehiyon 6 bangud sa kamatayon ni PDEA 6 identified drug group leader Richard Prevendido.        Nagapati si Iloilo Police Provincial Office director Marlon Tayaba nga mabudlayan na ang prevendido drug group sa pagpadayon sang drug business bangud nautod ang koneksyon sang grupo sa nag-supply sa ila.  Si Richard Prevendido amu ang may direkta nga koneksyon sa source sini sang illegal drugs gani ginapatihan nga magahina ang negosyo sang grupo.  Mahibaluan suno kay Tayaba kun ano kasangkad sang negosyo ni Prevendido sa tion nga maguwa ang resulta sang forensic examination sa narecover nga cellphones kag laptops sa ginapanaguan nga balay ni Prevendido.  Daku suno sa iya ang mabulig sang makuha nga impormasyon sa nasambit nga mga gadgets agud matumod kun sin-o pa ang posible may koneksyon sa Prevendido Drug Group. (JoMaque)