Negosyante Nga Ginadudahan Yara Sa Likod Sang Pag-Abduct Sa 22-Anyos Nga Dalaga Sa Ajuy Na-identify Na Sang Ajuy Police
Municipality of Ajuy – Na-identify na sang Ajuy police ang negosyante nga ginadudahan sang pamilya sang 22 anyos nga dalaga nga nagkuha sa iya sa Sitio Casamara, Barangay Central, Ajuy.
Suno kay Chief Inspector Charlie Sustento, hepe sang Ajuy Police tation, may composite sketch naman sila sang duha ka armado nga lalaki nga nagkuha kay alyas Era base sa nakita sang utod sang babaye.
Wala pa nakilala ang duha ka lalaki nga naga-uribay sang malaba nga pusil nga ginapatihan goons nga ginhire sang negosyante sa pagkuha kay Era.
Nagbalibad pa si Sustento sa paghingalan sa negosyante bangud ginahulat nila ang desisyon sang ginikanan ni Era kag ginasiguro man nga safe ang dalaga.
Nagasalig ang pamilya nga tumanon sang abductors ang ila pahayag nga ibalik ang dalaga sa sulod sang duha tubtob tatlo ka adlaw.
Lunes sang gab-i sang ginsulod sang duha ka lalaki si Era sa ila balay samtang nagatan-aw sang telebisyon upod sa iya ginikanan kag utod kag gindala.
(att)