“Marawi is liberated”

Gindeklarar ni Presidente Rodrigo Duterte ang paghilway sang Marawi City sa mga terorista.

Ginhimo ini sang Presidente sa nasambit man nga syudad kaina. Ginhimo ini ni Duterte matapos nga napatay ang ila mga lider nga sanday Omar Maute kag Isnilon Hapilon sa main battle zone kahapon.

Lima ka bulan nga nagpakig-away ang mga tropa sang gobyerno batuk sa mga terorista sa diin masobra 800 ka kaaway lakip ang foreign terrorists ang napatay. 162 ka tropa sang gobyerno kag 47 ka sibilyan man ang napatay sa inaway nga nagsugod sang Mayo 23 nga nangin rason agud ideklarar ni Duterte ang martial law sa Mindanao.

Sa pagtapos sang inaway, tutukan sang gobyerno ang liwat nga pagtukod sang Marawi. Ginabanta ni Duterte kag Defense Secretary Delfin Lorenzana nga masobra 50 billion pesos ang kinahanglan sa pagrehabilitate sang syudad. (With additional information from CNN Philippines/PTV)