‘Nagalapad ang buho’

Sta. Barbara, Iloilo–Nagalapad nga nagalapad ang ginapatihan sinkhole nga nagtuhaw sa Cabugao Sur, Sta. Barbara.

Suno kay Punong Barangay Nena Surabilla, una nga natabu sa ila barangay nga may nag-usmod nga duta kag nagresulta sang daku nga buho. Ginbanta ni Surabilla sa lima ka dupa ang kalaparon sang buho kag indi naman madeterminar ang kadalumon.

Indi na suno sa iya matungkad sang silak sang flashflight ang idalum sang buho. Ginpahayag ni Surabilla nga wala man sa ila ang mangisog nga maglingling sa buho sa kahadlok nga gulpi mag-usmod ang duta. (AGB)