Hepe sang Mandurriao Police Station, nag-suhestyun nga i-implementar ang liquor ban sa Smallville Complex kasunod sang shooting incident sang Dec. 3

Iloilo City — Nagalaum ang hepe sang Mandurriao Police Stations nga pamatian ang iya suhestyun nga magpatuman sang liquor ban sa guwa sang mga establisemento komersyal sa Smallville Complex pag-abot sang alas-10 sa gab-i.  Ini ang napaminsaran nga immediate solution ni Chief Inspector Juvy Navales agud mapabilin ang kalinong kag katawhay sa ginakabug nga night life hub sa syudad. Mas maayo suno kay Navales nga mapasaran sang City Council sang ordinansa ang iya suhestyun bangud madamo na nga handum ang wala nalab-ut bangud sang mga kinagamo sa Smallville. Pinakaulihi diri suno kay Navales ang  pagtiro patay sang Domingo sang aga sa bag-o lang nakapasar sa board exam nga medical technologist nga si Rey Myr Tan, 24-anyos sang Balantang, Jaro.  Napasakaan na sang kaso nga murder ang suspek nga si Vanlen Jyro Joseph Hulleza, 22-anyos sang Sambag, Jaro nga preso sa Mandurriao Police Station. Ginkasuhan man sang obstruction of justice ang duha ka tinawo ni Hulleza nga ginpahayag nagpugong sa mga pulis sang gin-aresto ang suspek. (JoMaque)