Pavianhon Nga Nag-Graduate Nga Valedictorian Sang PMA Alab-Tala Class 2018 Ginahalad Sa Mga Ilonggo Ang Kadungguanan Nga Iya Nabaton
Baguio City — Ginapakigbahin ni 2nd Lieutenant./ Ensign Jaywardene Hontoria sa mga Ilonggo ang iya bugal matapos nagpanguna sa Philippine Military Academy ukon PMA Alab-Tala Class 2018.
Sa graduation kahapon sang Alab Tala sa Baguio City, ginpabutyag ni Hontoria sa iya valedictory addreSs, nga nagtatak sa iya ang pahanumdom sa iya sang amay nga si Oscar sang ginhingyo niya siya nga tudluan mag-arado sang bata pa.
Mas mag-an suno sa iya amay nga mag-uyat sang ballpen sang sa mag-arado rason kinahanglan niya nga magtuon sang maayo.
Ginsaysay sang 25-anyos nga tumandok sang Sitio Linao, Brgy. Balabag, Pavia nga kinahanglan niya magbugtaw 3:00 A.M. sang una para maghigot sang mga utan nga produkto sa ila uma antes magkadto sa eskwelahan.
Ang ila sitwasyon suno kay Hontoria ang iya inspirasyon agud magtuon sang maayo kag makatibawas sa kapigaduhon.
Nangin emosyonal ang ginikanan ni Hontoria nga nagtambong kahapon sa iya graduation.
Doble naman ang selebrasyon bangud matapos ang graduation, ginkasal man kahapon si Hontoria sa iya girlfriend.
(ATT)